Poslovne vijesti - Makedonija

Ќе поевтинат разговорите преку мобилен!?

Има простор за поевтинување на разговорите преку мобилен телефон.

Агенцијата за електронски комуникација (АЕК) ги намалува цените на големо за услуга што еден оператор му ја плаќа на друг за користење на неговата мрежа. Директорот на АЕК, Петар Ивановски, смета дека тоа е основ за намалување и на малопродажните цени за корисниците.

- Анализите покажаа дека големопродажните цени кај сите три мобилни оператори за услугата завршување на повик има простор да се намалат од 10 до 15 проценти, со тоа се создаваат услови за намалување на цената и за крајните корисници - вели Ивановски.

Досега Агенцијата за електронски комуникации ги регулираше цените за завршување повик во сопствена мрежа на Т-Мобиле и на ОНЕ и во моментов тие изнесуваат 3,8 денари. Операторот ВИП за оваа услуга наплаќа 5,85 денари, но од сега и тој ќе биде регулиран од АЕК, бидејќи е прогласен за оператор со значителна моќ во овој сегмент.

Трите мобилни оператори засега без одговор дали ова ќе предизвика намалување на цените кон крајните корисници. Дали ќе има поевтинување на разговорите преку мобилен телефон ќе објават кога од АЕК ќе ги добијат новите големопродажни цени.

На сите оператори кои според АЕК имаат значителна моќ, ќе им се наметне и обврска да ја изнајмуваат својата инфраструктура по однапред одредена цена на други оператори што сакаат да влезат на пазарот.

- Им наметнуваме обврска на операторите да ја изнајмуваат својата инфраструктура и создаваме услови да се појави виртуелен мобилен оператор. Доколку има заинтересираност од која било фирма, домашна или странска, ќе може да изнајмува инфраструктура од страна на операторот со значителна пазарна моќ. Додека не ја финализираме анализата, не би сакале да се калкулира со името на операторот велат од АЕК.